विजयपुर । रवि लामिछाने नेतृत्वको राष्ट्रिय स्वतन्त्र पार्टीका नेता कार्यकर्ताहरूले पार्टी परित्याग गरेका छन् ।
केन्द्रीय नेतामा नैतिकता नभएको भन्दै १ नं. प्रदेश निर्वाचन परिचालन समितिका सभापतिसहित तीन तहका नेता कार्यकर्ताले धरानमा मङ्गलबार पत्रकार सम्मेलन गर्दै पार्टी परित्याग गरेका हुन् ।
समितिका सभापति सञ्जीव भट्टराईसहित सुनसरी जिल्ला सचिव तथा १ नं. प्रदेश निर्वाचन परिचालन समितिका उपसभापति प्रेमप्रसाद तिमिल्सिना, प्रदेश समिति सदस्य सिल्पा भट्टराई, धरान उपमहानगरका सभापति राम कार्कीलगायतले पार्टी परित्याग गरेको घोषणा गरे । उनीहरूले स्वतन्त्र पार्टीका केन्द्रीय नेताको नीति सिद्धान्त, आदर्श, उद्देश्य, विधानबाट पथभ्रष्ट भई आर्थिक अपचलन र स्वेच्छारिताका कारणले पार्टी परित्याग गरेको बताए ।
निर्वाचन परिचालन समितिका सभापति भट्टराईले स्वतन्त्र पार्टीमा कुनै पनि नीति, विचार, सिद्धान्त, दृष्टिकोण र विकासको स्पष्ट योजना नभएको र स्वतन्त्रको माहोल देखेर पार्टी दर्ता गरेको दाबी गरे । उनले भने, ‘रवि लामिछानेले जनतासँग भ्रमको खेती गरेका छन् ।’
रवि लामिछानेले सञ्चारमाध्यममा कसैसँग चन्दा सङ्कलन नगर्ने घोषणा गर्ने तर, पार्टीको तल्लो कार्यसमितिमा रसिद पठाई तोकेबमोजिमको चन्दा उठाउन दबाव दिने गरेको बताए । उनले स्वतन्त्र पार्टीले उम्मेदवारका लागि भन्दै नेपालभरका आकाङ्क्षीहरूदेखि १२ हजार ५ सयका दरले रकम असुलेको पनि दाबी गरे ।
टिकट नपाएका व्यक्तिको रकम फिर्तासमेत नगरेको बताए । उनीहरूले जारी गरेको विज्ञप्तिमा ‘नेपालभर पुगेर भ्रष्टाचार गर्दिनँ, विकास गर्छु भन्नु तर, विकासको रोडम्याप आधार प्रस्तुत गर्न नसक्नु, सातै वटा प्रदेशको अधिवेशनदेखि प्रदेशसभाको निर्वाचनमा भाग नलिने निर्णय गर्नु, सङ्घीयताको विरोध गर्नु, सङ्घीयता खारेजीको एजेन्डा बहसमा ल्याउन नसक्नु पार्टी सभापति र महामन्त्रीको ढुलमुले र अपरिपक्वता’ को ज्वलन्त उदाहरण भएको उल्लेख छ ।
समितिका सभापति भट्टराईले स्वतन्त्र पार्टी पनि अन्य राजनीतिक दलभन्दा फरक नरहेकाले पनि सामूहिकरूपमा पार्टी परित्याग गरेको बताए । सभापति भट्टराईले १ नं. प्रदेशका १ हजार ९ सय नेता, कार्यकर्ताले सामूहिकरूपमा पार्टी परित्याग गरेको दाबी गरे ।
