धनकुटा । धनकुटामा भएको नमुना मतदानमा सहभागी वृद्धवृद्धा मतदाताहरूले वास्तविक चुनाव चिह्न खोजेपछि मतदानस्थलमा खटिएका कर्मचारीहरूलाई सम्झाउनको हैरानी भएको छ ।
जिल्ला निर्वाचन कार्यालय धनकुटाले सोमबार आयोजना गरेका नमुना मतदान कार्यक्रममा सहभागी वृद्धवृद्धा मतदाताहरूले साँच्चिकै चुनाव चिन्ह छैन त ? भन्दै खोज्न थालेपछि त्यहाँ खटिएका कर्मचारीहरूलाई सम्झाउनको हैरानी परेको हो । उनीहरूले आफूले मत दिन चाहेको पार्टीको चुनाव चिह्न नमुना मतपत्रमा नदेखेपछि मतदानस्थलमा खटिएका कर्मचारीहरूलाई पटक–पटक हातमा मतपत्र लिएर सोधेका थिए ।
नमुना मतदान भए पनि निर्वाचन कार्यालयले साँच्चिकै निर्वाचन नै हो कि भन्ने सर्वसाधारणलाई आभास हुने गरी व्यवस्थापन गरेकाले यस्तो भएको हुन सक्ने मतदानस्थलमा खटिएका एक सुरक्षा अधिकारीले बताए ।
नमुना मतदान कार्यक्रममा सर्वसाधारण नागरिक, ज्येष्ठ नागरिक, व्यापारी, किसान, युवा सबै उमेरका मतदाता सहभागी भएको जिल्ला निर्वाचन अधिकारी जयराम श्रेष्ठले बताए ।
नमुना मतदान कार्यक्रममा करिब १ सय ५० भन्दा बढी सहभागी रहेको निर्वाचन अधिकारी श्रेष्ठले बताए । उनले मतदानस्थलमा ज्येष्ठ नागरिक, अपाङ्ग, अशक्त, महिला, पुरुष मतदाताहरूलाई छुट्टाछुट्टै मतदान गर्न लाइनको व्यवस्था गरिएको जानकारी दिए ।
