पाँचथर । एक मात्र प्रतिनिधि सभा रहेको पाँचथर जिल्लामा नेकपा एमालेका बसन्तकुमार नेम्वाङ र गठबन्धनको तर्फबाट नेपाली कांग्रेसका सहमहामन्त्री भिष्मराज आङ्देम्बे बीच कडा प्रतिस्प्रधा हुने भएको छ ।
एक मात्र निर्वाचन क्षेत्र रहेको पाँचथरमा यो पटक पनि हेभिवेट नेताबीच प्रतिस्पर्धा हुन लागेको हो । आठ स्थानीय तह रहेको जिल्लामा कांग्रेस सहमहामन्त्री भिष्मराज आङदेम्बे र एमाले नेता वसन्तकुमार नेम्बाङबीच प्रतिस्पर्धा हुन लागेको हो ।
२०७४ सालमा प्रतिनिधिसभा सदस्यमा निर्वाचित एमाले नेता वसन्तकुमार नेम्बाङ एमालेमा प्राप्त जिम्मेवारी पुरा गर्ने नेताका रुपमा परिचित छन । कांग्रेसबाट पराजित भिष्मराज आङदेम्बेको राजनीतिक पहिचान पनि यो पटक फेरिएको छ । उनि पाटीको १४ औं महाधिबेशनबाट सहमहामन्त्रीमा निर्वाचित भएका थिए ।
२०७४ को निर्वाचनमा बामगठबन्धनको साथ पाएका एमालेका नेम्बाङले फराकिलो मत अन्तरले कांग्रेसका आङदेम्बेलाई पराजित गरेका थिए । बामगठबन्धनको साथ पाएका नेम्बाङले ३८ हजार ६ सय १६ मत ल्याउदा आङदेम्बेले २८ हजार ३५ मत प्राप्त गरेका थिए । दुई नेताबीच १० हजार ६ सय १६ मतान्तर थियो । तर अहिले परिस्थिति फेरिएको छ ।
२०७४ मा बसन्तलाई साथ दिएका माओवादी केन्द्र अहिले कांग्रेसलाई साथ दिदैछ् । तत्कालिन एमाले बिभाजित भई बनेको एकिकृत समाजवादीले पनि कांगेसलाई नै साथ दिएको हुदा आङ्देम्बेलाई जीत निकाल्न सहज हुने उनि निकटका नेताहरु बताउछन ।
एमाले एक्लै यसपटकको चुनावी मैदानमा होमिएको छ । जसपा र राप्रपाले सहयोग गर्ने भनिए पनि ति दलहरुले उमेद्धवार उठाएर चुनावी गतिविधिलाई तिब्र पारेका छन ।
गत स्थानीय तहको परिणाम हेर्ने हो भने जिल्लाका ८ पालिकामध्ये ६ पालिका जित्दै कांग्रेस पहिलो दल बनेको छ भने एमाले र माओवादीले एक–एक पालिका जित हासिल गरेका छन । कांग्रेसले कुम्मायक, तुम्मबेवा, फालेलुङ, फाल्गुनन्द र हिलिहाङ गाउँपालिका सहित फिदिम नगरपालिका जितेको छ ।
त्यस्तै, माओवादीले मिक्लाजुङ गाउँपालिका र एमाले याङवरक गाउँपालिकामा जित हासिल गरेको छ । तर वडागत मतका आधारमा हेर्ने हो भने एमालेको सबैभन्दा बढी मत भए पनि सत्ता गठबन्धनका दलहरुको मत एमालेको भन्दा साढे १२ हजार बढी छ ।
स्थानीयतहको निर्वाचनमा नेकपा एमालेले– ३०, ९५८ मत ल्याउदै पहिलो दल बन्यो भने नेपाली कांग्रेस– २५, ०६५ मत ल्याउदै दास्रो बनेको थियो । त्यस्तै नेकपा माओवादी केन्द्र– ११, ८०८ ल्याउदै तेस्रो दल बनेको छ । त्यसैगरी जनता समाजवादी पार्टी– २,६४३, एकीकृत समाजवादी– २,१६१ र राष्ट्रिय प्रजातन्त्र पार्टीले– १,९०९ मत प्राप्त गरेका थिए ।
स्थानीयत तहमा दलहरुले पाएको मत हेर्ने हो भने सत्ता गठबन्धन एमाले भन्दा बलियो देखिएको छ । तर चुनावमा माहोल कता तर्फ फर्किन्छ भन्ने टुङ्गो नभएका कारण नेम्बाङ र आङ्देम्बे बीचको प्रतिस्प्रधा रोचक हुने अनुमान गरिएको छ ।
नेम्वाङ २०४८ र २०५६ र २०७४ मा बिजय हुदै सांसद भएका छन भने केपी शर्मा ओलीको पालामा भौतिक पूर्वाधार मन्त्री हुँदा गरेको कामले लोकप्रिय छन । आङदेम्बे पनि संविधानसभामा निर्वाचित भएका थिए । उनि पनि मतदाताबीच लोकप्रिय मानिन्छन् ।
