सुनसरी । आगामी मङ्सिर ४ गते हुने प्रतिनिधिसभा र प्रदेशसभा सदस्य निर्वाचन कोसी गाउँपालिका वडानम्बर २ का घनश्याम कविरथको लागि पहिलो अनुभव हुनेछ । त्यसैले उनी संसदीय निर्वाचनमा पहिलोपटक मत खसाल्न उत्साहित देखिन्छन् ।
हालसम्म कुनै पनि निर्वाचनमा मत नखसालेको र निर्वाचनको मिति नजिकिँदै गर्दा मतदान गर्न आफू उत्साहित भएको १९ वर्षका घनश्याम बताउँछन् । सुनसरी सदरमुकामसमेत रहेकोे इनरुवा नगरपालिका–९ बबियाकी २० वर्षीया नुसरत प्रवीण यसपटक आफू मत दिन आतुर देखिएकी छन् । उनीहरूजस्ता हजारौं मतदाता मङ्सिर ४ मा पहिलोपटक मतदान गर्न उत्साहित देखिन्छन् ।
पहिलोपटक मतदान गर्न प्रतिक्षारत सुनसरीका नयाँ मतदाताहरू परिवर्तनको पक्षमा आफूहरूले मत हाल्ने बताउँछन् । शिक्षा, स्वास्थ्य, रोजगारी, खेलकुदका पूर्वाधार निर्माण र सामाजिक विकृति विसङ्गति विरुद्ध आवाज उठाउनेलाई मतदान गर्ने सुनसरी बहुमुखी क्याम्पस इनरुवामा अध्ययनरत विशाल ठाकुरले बताए ।
आफैले पहिलोपटक आफ्ना प्रतिनिधि छनोट गर्न नयाँ पुस्ताका मतदाता उत्साहित सँगसँगै सचेत देखिन्छन् । आफू पहिलोपटक मतदानमा सहभागी हुन लागेको बताउने नुसरत प्रवीण योग्य र समक्ष उम्मेदवारलाई मत दिने बताउँछिन् । ‘हरेक परिवारका सदस्य कुनै न कुनै दलको चुनाव चिह्न हेरेर मतदान गर्ने तयारीमा छन्’ उनले भनिन्, ‘तर, आफूजस्ता नयाँ पुस्ताका मतदाताले उम्मेदवारहरूको एजेण्डा अध्ययन गरेर मत दिनुपर्ने आवश्यकता देखेकी छु ।’
सबै मतदातासँग घुलमिल हुनसक्ने, स्वच्छ र सक्षम, हाम्रोभन्दा पनि राम्रो उम्मेदवारलाई मत दिनुपर्ने उनको तर्क छ । ‘आजसम्म मैले भोट हालेको छैन । पहिलो भोट हाल्ने दिन कुरिरहेको छु’ हरिनगर गाउँपालिका–२ रामनगर भुटाहाका राशिद अन्सारीले भने, ‘स्थानीय तहको निर्वाचनमा उमेर पुगेको थिएन, त्यसबेला भोट हाल्न पाइएन । यसपालि नाम चढेको छ, त्यसैले भोट हाल्ने प्रतीक्षामा छु ।’
भोट खसाल्ने प्रतीक्षा गरिरहेका अन्सारीले चुनावमा दलभन्दा पनि व्यक्तिको योग्यता र एजेण्डा हेरेर मत खसाल्ने बताए । पार्टी मात्रै हेरेर के गर्नु ? भाषण र आश्वासनले मात्र अब चल्दैन । ‘घरका मान्छेले हाल भनेर पनि हुँदैन, म आफ्नो नेता आफै छनोट गर्नेछु’–इनरुवाकी प्रवीणले भनिन् । गाउँमा चुनावी माहोल तातिरहेको अवस्थामा सुनसरीको कोसी गाउँपालिका–८ का सलाउद्दिन आलमलाई पनि छट्पटी भइरहेको छ । पहिलोपटक मतदानमा सहभागी हुन लागेका उनलाई पहिलोपटक आफ्नो मत खेर जाने हो कि भन्ने चिन्तासमेत लागेको छ । ‘आजसम्म भोट हालेको छैन, मत बदर पो हुने हो कि ?’ आलमले भने, ‘मेरो पहिलो भोट सही उम्मेदवारलाई दिनेछु, योग्य व्यक्तिले चुनाव जित्न जरुरी छ ।’
जतिसुकै प्रचार र आश्वासन दिए पनि युवाको भावना बुझ्नेलाई मात्र मतदान गर्ने अर्का स्थानीय वीरेन्द्र कामैत बताउँछन् । पहिलोपटक भोट हाल्न पाउने भएपछि उनमा पनि खुसी छाएको छ । गाउँमा सडक, खानेपानी, शिक्षा र स्वास्थ्य क्षेत्रको विकास गर्ने एजेण्डा बोकेका उम्मेदवारलाई भोट हाल्ने कामैतको कथन छ ।
यतिबेला विभिन्न पार्टीका उम्मेदवार र कार्यकर्ताहरू टोल–टोलमा भोट माग्न व्यस्त छन् । तर, नयाँ पुस्ता भने पार्टीको पक्षमा नभई व्यक्तिको पक्षमा उभिने तयारीमा छन् । यसपटक पहिलोपटक भोट खसाल्ने तयारीमा रहेका कोसी गाउँपालिका वडानम्बर ४ का प्रवेज मन्सुरी पनि निकै उत्साहित छन् ।
आफ्नै घरनजिक रहेको विद्यालयको मतदान केन्द्रबाट मतदान गर्ने तयारीमा रहेका १९ वर्षका उनी भन्छन्, ‘जीवनमा पहिलोपटक नेता छान्ने अवसर आएको छ, यो बेलामा हामीले अरूको लहलहैमा भोट खेर फाल्नु हुँदैन । चुनाव चिह्न र अनुहार हेरेर आफ्नो मत खेर जान नदिने बताउँदै मन्सुरीले पूर्वाधार विकासको स्पष्ट खाका बोकेका उम्मेदवारलाई मतदान गर्ने निर्णयमा आफू पुगेको बताए ।
