धरान । नेकपा (एमाले) बाट विद्रोह गरी स्वतन्त्र उम्मेदवारी दिएका मनोजकुमार मेन्याङ्बोले गठबन्धन दलका ठूला उम्मेदवार भन्नेहरू आफ्नो उम्मेदवारीले तिलमिलाएको बताएका छन् ।
आसन्न मङ्सिर ४ को सुनसरी १ बाट प्रतिनिधिसभाका प्रत्यक्षतर्फका उम्मेदवार मेन्याङ्बोले धरानको भानुचौकमा चुनावीसभा गर्दै गठबन्धन दलका उम्मेदवारहरू आफ्नो उम्मेदवारीले तिलमिलाएको बताए । उनले भने, ‘ठूला–ठूला गठबन्धन गरेर आएकाहरू तिलमिलाएका छन् । धराने छोरो, एक नम्बर क्षेत्रको छोरोको पक्षमा, एक नम्बरको विकास बाहकको पक्षमा आज धरानका एक नम्बर क्षेत्रका जनताहरू मेरो पक्षमा आएका कारण तिलमिलाएका छन् ।’
उनले कतिपयले आफ्नो उम्मेदवारीलाई नेकपा (माओवादी केन्द्र)का उम्मेदवारलाई जिताउने षड्यन्त्रका रूपमा व्याख्या गरिरहेको बताए । उनले भने, ‘अहिले अफवाह फैलाउन थालेका छन् । मनोज मेन्याङ्बो आफूले जित्न लडेको होइन, माओवादीका उम्मेदवारलाई जिताउनका लागि षड्यन्त्र गरेर आएको मान्छे हो । मित्रहरूलाई के चाहिँ लाग्छ ? मेरो उम्मेदवारी म कसैलाई जिताउनका लागि छद्मभेषी भएर जिताउन आएको होइन । म राजनीतिकर्मी पनि हुँ । म आफै जित्न, म एक नम्बर क्षेत्रका जनतालाई जिताउनका लागि आएको हुँ ।’ उनले आफूले सुनसरी १ का जनतालाई अधिकार सम्पन्न बनाउनका लागि आफ्नो उम्मेदवारी भएको दाबी गरे ।
उनले नेपालका ठूला पार्टीहरूले नेता तथा कार्यकर्ताहरूको भावनालाई कहिल्यै कदर नगरेकाले आफ्नो उम्मेदवारी रहेको बताए । ‘इतिहासमा हिजो पञ्चायतकालमा होस् । गणतान्त्रिक कालमा होस् । हामी सधैँ उपेक्षित हुँदै आयौं । धरानका विकासका लागि अनुनय विनय गर्दै आयौं, धेरै योजनाका लागि बिन्ती बिसायौं’ उनले भने, ‘धरान र धरान आसपासका क्षेत्रको विकासका लागि अहिलेसम्म पनि ठूला कार्यक्रमहरू प्राप्त गर्न सकेनौं । ठूला बजेटहरू प्राप्त गर्न सकेनौं । यो विडम्बना त थिँदै थियो । ठूला पार्टीका नेता र कार्यकर्ताहरूले आफ्नो नेता पनि चुन्न पाउन छाडे ।’
उनले नेताको कार्यशैलीलाई लिएर आफूले एमालेबाट साधारण सदस्य पनि नरहने गरी राजीनामा गरेर प्रतिनिधिसभामा ‘खरायो’ चुनाव चिह्न लिएर सदस्यको प्रत्यासी भएको बताए । उनले आफूले जितेर गएमा यस क्षेत्रका सडक सञ्जालहरू सहरदेखि गाउँ र सहरदेखि पहाडसम्मको लिङ्क रोड जोडेर व्यवस्थित गर्ने बताए । उनले धरानका नगर प्रमुख हर्क साम्पाङसँग मिलेर धरानको खानेपानी योजनालाई सफल बनाउने बताए ।
मेन्याङ्बोको प्रचार–प्रसार विभागका संयोजक किशोरकुमार कार्कीको सभापतित्वमा भएको कार्यक्रममा नेपाली काङ्ग्रेसका नेता प्रेमप्रसाद पराजुली, एमालेबाट कारबाहीमा परेका पहलमान बस्नेतलगायतले बोलेका थिए ।
काङ्ग्रेस नेता पराजुलीले विकासका संवाहक मनोजकुमार मेन्याङ्बोलाई जिताउनका लागि आफू लागिपरेको बताए । उनले भने, ‘म नेपाली काङ्ग्रेसको कार्यकर्ता भए पनि उनलाई सहयोग गरेँ । विगतका कर्महरू हेर्दै जाँदा मनोजजस्तो अर्को उम्मेदवार पाउन सकिएन ।’ कार्यक्रमपूर्व ¥याली निकालिएको थियो ।
