विराटनगर । आइतबार बिहान सात बजेबाट सुरु हुने मतदानका लागि मतदाताहरू बिहानै मतदानस्थल आउन थालेका छन् ।
मतदानको समय बिहान ७ बजेदेखि सुरु हुने भए पनि चाँडै पालो पाइने भन्दै मतदाताहरु झिसमिसेमै मतदानस्थल पुगेर लाइन बसेका हुन् । मोरङ क्षेत्र नं. ६ को जनपथ मावि मतदान केन्द्रमा मतदाताहरु बिहानै लाइनमा बसेको देखियो ।
मोरङमा ८ सय ३९ वटा मतदान केन्द्र र ३ सय ६ वटा मतदान स्थल रहेको छ । जिल्लामा ७ लाख ३५ हजार ५ सय २५ जना मतदाता रहेका छन् । जसमा ३ लाख ७४ हजार ३ सय २६ जना पुरुष र ३ लाख ६१ हजार १ सय ९३ जना महिला रहेका छन् भने ६ जना अन्य रहेका निर्वाचन कार्यालयले जनाएको छ ।
मोरङ कारागार र आर्दश पुष्तकालय विराटनगरमा अस्थायी मतदान केन्द्र बनाएको छ । मोरङमा सबैभन्दा बढी मोरङको ३ नम्बर क्षेत्रमा बढी मतदाता रहेका छन् । क्षेत्र नं. १ मा १ लाख २३ हजार ६१५, क्षेत्र नं. २ मा १ लाख २४ हजार ७२९, क्षेत्र नं. ३ मा १ लाख ४९ हजार ८३३, क्षेत्र नं. ४ मा १ लाख १० हजार ९३, क्षेत्र नं. ५ मा १ लाख ४ हजार ९४ र क्षेत्र नं. ६ मा १ लाख २६ हजार ७ सय ६१ जना मतदाता रहेका छन् ।
मोरङमा २ सय १५ जना उम्मेदवार चुनावी मैदानमा उत्रिएका छन् । प्रतिनिधी सभा सदस्यमा १०५ र प्रदेश सभातर्फ १ सय १० जना उम्मेदवार रहेका छन् ।
