धरान । सुनसरीको बर्जु गाउँपालिका–५ स्थित एक मतदान केन्द्रमा विष्फोट हुँदा एक बालिका घाइते भएकी छन् ।
नेपाल राष्ट्रिय माध्यमिक विद्यालयमा रहेको मतदान केन्द्रको गेटनजिकै विष्फोट हुँदा एक बालिका घाइते भएकी हुन् । विष्फोटपश्चात् त्यहाँ भागदौड मच्चिएको थियो ।
बालिकाको स्थानीय मेडिकलमा उपचार गरिएको जिल्ला प्रहरी कार्यालयका एसपी प्रभु ढकालले जानकारी दिए । सुनसरी ३ को उक्त केन्द्रमा पटाका विष्फोट भएको र बालिका सामान्य घाइते भएको प्रहरीले जनाएको छ । यता झापाको बिर्तामोडको देवी मावि मतदान केन्द्रमा मतपत्र च्यात्ने एक मतदातालाई पक्राउ गरिएको प्रहरीले जनाएको छ ।
मादक पदार्थ सेवन गरी मतदान गर्न आएका बिर्तामोड नगरपालिका–५ किरात चोकका ४८ वर्षीय भूपेन्द्र खतिवडालाई पक्राउ गरिएको इलाका प्रहरी कार्यालय बिर्तामोडका डिएसपी रुगमबहादुर कुँवरले जानकारी दिए । उनलाई मतदान केन्द्रबाटै पक्राउ गरिएको हो । कानूनमा मतपत्र च्यात्नेलाई एक लाख रुपैयाँसम्म जरिबाना तथा २ वर्षसम्म कैद हुने व्यवस्था रहेको छ ।
बाजुरामा गोली लागी एकको मृत्यु
बाजुरामा सुरक्षाकर्मीको गोली लागेर एकजनाको मृत्यु हुनाका साथै तीनजना गम्भीर घाइते भएका छन् ।
बाजुराको त्रिवेणी नगरपालिकाका नगरप्रमुख कर्णबहादुर थापाका अनुसार त्रिवेणी नगरपालिका–७ स्थित नाटेश्वरी आधारभूत विद्यालयमा रहेको मतदान केन्द्रमा प्रहरी र स्थानीयवासीबीच झडप हुँदा गोली लागेर स्थानीय सञ्जीव ऐडीको घटनास्थलमै मृत्यु भएको हो । उनका अनुसार सुरक्षाकर्मीको गोली लागेर स्थानीय परशुराम पाध्याय, खड्क ऐडी र प्रेम थापा गम्भीर घाइते भएका छन् ।
बाजुरा सदरमुकाम मार्तडीस्थित बडिमालिका–९ कालिका मावि मतदानस्थलमा समेत प्रहरीले हवाई फायर गरेको थियो । सो ठाउँमा नेपाली काङ्ग्रेस र नेकपा (एमाले)का कार्यकर्ताबीच झडप भएको थियो । त्यसैगरी बाजुराको बूढीनन्दा नगरपालिका, बूढीगङ्गा नगरपालिकालगायतका केही पालिकामा विवाद भएपछि मतदानसमेत स्थगन भएको छ ।
