विराटनगर । जनता समाजवादी पार्टी नेपाल (जसपा) का अध्यक्ष उपेन्द्र यादवले एमालेसँग चुनावी तालमेलका लागि गरिएको सहकार्य निर्वाचनपछि सकिएको बताएका छन् ।
विराटनगर विमानस्थलमा सञ्चारकर्मीसँग कुरा गर्दै यादवले यस्तो बताएका हुन् । उनले तत्कालीन हिसाबले गरिएका सहकार्य चुनाव सकिएसँगै अन्त्य भएको बताए । ‘हामीले तत्कालका लागि केही सिटमा तालमेल गरेका हौं । हाम्रो मोर्चाबन्दी र तालमेल होइन । हामीले केही सिटमा सहयोग ग¥यौं, उहाँहरूले केहीमा गर्नुभयो । त्यो चुनावसँगै सकियो’ यादवले भने, ‘अब नयाँ धरातलमा नयाँ ढङ्गले कसरी जाने भन्ने विषयमा छलफल हुन्छ ।’
यादवले आफ्नो पार्टी निर्णायक नभएको र अब आफूहरूले उठाउँदै आएको मुद्दामा केन्द्रित हुन जनताले म्यान्डेट दिएको पनि बताए । ‘हाम्रो पार्टी निर्णायक होइन । चुनावबाट काङ्ग्रेस र एमालेलाई निर्णायक बनायो । हाम्रो पार्टी भनेको यो चुनावपछि एउटा मुद्दाको राष्ट्रिय सवालमा हामीले जुन विगतदेखि आवाज उठाइरहेका छौं, त्यो उठाउने जनादेश आयो’–यादवले भने ।
अहिलेको निर्वाचनमा केही महिनाअगाडि स्थापना भएको राष्ट्रिय स्वतन्त्र पार्टीले धमाका दिएको, मधेस नेपाल नै होइन भन्ने जनमत पार्टीले म्यान्डेट पाएको र राजतन्त्र फर्काउने एजेन्डा लिएको राप्रपाले धेरै मत पाएको विषयमा अध्ययन हुनुपर्ने पनि बताए ।
‘घण्टी छाप आएको छ । चुनावभन्दा अगाडि आएको राष्ट्रिय स्वतन्त्र पार्टीले यत्रो धमाका दियो । जनमत पार्टी मधेशै अलग बनाउँछु भनेर आएको पार्टी हो । उसको मूल स्लोगन नै ‘मधेश इज नट नेपाल’ थियो । त्यसो भनेर आएको पार्टीले म्यान्डेट पायो । अहिले आएको जनमतबारेको जिज्ञासामा यादवले भने, ‘अहिलेको परिवर्तन होइन, पहिलेकैमा जानुपर्छ भन्ने राप्रपा अगाडि आयो । यो अध्ययनको विषय हो । पुराना पार्टी र नेताहरूले गरेको कामबाट अलिक फ्रस्टेड भएर नेगेटिभ भोटबाट आएको हो कि ?’
यादवले डेमोक्रेटिक रेभुलेसनले ल्याएको उपलब्धि र सङ्घीय लोकतान्त्रिक गणतन्त्रलाई जोगाउनका लागि त्यसका पक्षपातीहरू एकताबद्ध हुनुपर्नेमा जोड दिए । ‘जसले परिवर्तन ल्याए ती क्रान्तिकारी शक्तिहरू पछि परेका छन् । जुन मक्सदका लागि ज्यान दिएर आन्दोलनहरू भए त्यो हाँसीमजाकजस्तो भएको छ, त्यो दुर्भाग्यपूर्ण भयो’ यादवको भनाइ छ, ‘नेतृत्व गर्नेको कमजोरी भए पनि यो मुलुकको क्यारेक्टर त्यस्तै खालको भएको छ । जुन पहिले पनि नेपालले भोेगेको हो र अहिले पनि त्यही देखिएको छ ।’
यादवले अहिले सत्तापक्ष र प्रतिपक्षको कित्तामा उभिने निर्णय गरिनसकेको बताए । ‘प्रतिपक्षी कि सत्तापक्ष भन्ने विषय हामीले तय गरेका छैनौं । सबै चुनावी परिणाम आइसकेपछि हामी कार्यकारिणी समितिको बैठक बस्छौं । त्यसपछि सरकार बनाउने पार्टीले के का लागि सरकार बनाउने हो । हामीले उठाएको मुद्दा के हुन्छन्लगायतका कुरा बुझेर हामी निर्णय गर्छौं’ यादवले भने, ‘सरकारमा बस्ने कि जाने भन्ने विषयमा हामीलाई अहिले हतार छैन । हतार त काङ्ग्रेस, एमाले त्योभन्दा बढी माओवादीका साथीहरूलाई देख्छु ।’
यादवले संविधानमा उल्लेखित निर्वाचन प्रणाली, शासकीय स्वरूप, न्यायिक प्रणाली, समावेशीकरण, पहिचानका सवाल र प्रदेशका अधिकार सम्पन्न बनाउने कुराहरू संशोधन नगर्ने हो भने सिस्टम नै ‘कोल्याप्स’ हुनसक्ने बताए । यस्तै अहिले मुलुक आर्थिकरूपले निक्कै तल गएको पनि उनको भनाइ थियो ।
