इनरुवा । काठमाडौँको तीनकुने घटनामा पत्रकारको ज्यान गएको विषय छानबिनको माग गर्दै नेपाल पत्रकार महासङ्घ सुनसरीले प्रमुख जिल्ला अधिकारीसमक्ष ज्ञापन–पत्र बुझाएको छ ।
महासङ्घ सुनसरी अध्यक्ष सन्तोष काफ्लेसहितको टोलीले जिल्ला प्रशासन कार्यालय पुगेर प्रमुख जिल्ला अधिकारी धमेन्द्रकुमार मिश्रलाई ज्ञापन–पत्र बुझाएको हो । प्रजिअमार्फत् गृह मन्त्रालय पठाइएको ज्ञापन–पत्रमा समाचार सङ्कलनको क्रममा ज्यान गुमाएका पत्रकार सुरेश रजकको मृत्युलाई शङ्कास्पद भनिएको छ । राजावादीको आन्दोलनको समाचार सङ्कलनका क्रममा आगलागीमा परी ज्यान गुमाएका पत्रकार रजकको घटनालाई सूक्ष्मरूपमा अनुसन्धान गर्न पत्रकार महासङ्घ सुनसरीको माग छ ।
महासङ्घ सुनसरीले सरकारसमक्ष पत्रकारहरूको सुरक्षा ग्यारेन्टीको मागसमेत गरेको छ । ज्ञापन–पत्र बुझाउँदै महासङ्घ सुनसरी अध्यक्ष काफ्लेले पत्रकार रजकको ज्यान गएको घटना निन्दनीय भएको बताए । उनले घटनाको वास्तविकता पत्ता लगाई दोषीलाई कारबाहीको दायरामा ल्याउन मागसमेत गरे ।
काफ्लेले पत्रकारमाथिको कुनै पनि किसिमको आक्रमण सह्य नहुने बताए । उनले पत्रकारहरूको सुरक्षामा सबै पक्ष जिम्मेवार हुन आवश्यक रहेको बताए । ज्ञापन–पत्र बुझ्दै प्रजिअ मिश्रले सुनसरीका पत्रकारहरूको शान्ति सुरक्षाको सवालमा प्रशासन सदैव साथमा रहेको बताए । उनले समाचार सङ्कलनको क्रममा भने सञ्चारकर्मीहरूले सम्भावित घटना र अवस्थाको पूर्वानुमान गरेर रिपोर्टिङको कार्यलाई सुरक्षित बनाउन सुझाव दिए ।
