विजयपुर । सहकारीको रकम अपचलनको आरोप लागेका धरान–९ स्थित भविष्य बचत तथा ऋण सहकारी संस्थाका अध्यक्ष इन्द्र लिम्बूलाई नियन्त्रणमा लिई प्रहरीलाई बुझाए पनि प्रहरीले बुझ्न नमानेको बचतकर्ताहरूले बताएका छन् ।
बिहीबार बचतकर्ताहरूले अध्यक्ष राईलाई घरबाटै नियन्त्रणमा लिई प्रहरीलाई बुझाएको बचतकर्ताद्वय रश्मी प्रधान र राम लिम्बूले बताए । तर, प्रहरीमा बुझाए पनि बुझ्न नमानेको आरोप लगाए । बचतकर्ता प्रधानले प्रहरी कार्यालयमा जिम्मा लगाए पनि प्रहरीले कारबाही गर्न नमानेको बताइन् । उनले भनिन्, ‘प्रहरीमा जिम्मा लगाएका थियौं तर, प्रहरीले राख्न मानेन ।’
प्रहरीले आफूहरूलाई छलफल गराउने जिम्मा मात्रै भएको जवाफ दिएको बताउँदै भनिन्, ‘प्रहरीले पक्राउ गरी कारबाही नगरे कसले गर्छ ? सयौँको रकम अपचलन गरेको छ ।’ उनले आफूले जाहेरी दिन्छु भन्दा पनि प्रहरी दर्ता गर्न नमानेको बताइन् । उनले भनिन्, ‘जाहेरी दिन्छु भन्दा पनि कारबाही गर्न मिल्दैन भन्छन् ।’
यता इलाका प्रहरी कार्यालय धरानका डीएसपी बुद्ध श्रेष्ठले लेनदेनको मुद्दा प्रहरीले नहेर्ने बताए । उनका अनुसार बचतकर्ताले आफूलाई फोन गरी जानकारी गराएपछि के रहेछ भनेर अध्यक्ष लिम्बूलाई बुझ्नका लागि प्रहरी कार्यालयमा ल्याएका हौं । उनले भने, ‘पक्राउ गरेका होइनौं । छाडेका पनि छैनौं । छलफल गराएर पठाउने हो ।’
बचतकर्ताले आफूलाई गालीगलौज गर्यो भनेर गुनासो गरेको भए पनि त्यही आधारमा थुनेर राख्न नमिल्ने बताए । डीएसपी श्रेष्ठले चेकलगायत प्रमाण भएकाले अदातलमा मुद्दा लाग्ने भनी जानकारी गराएको बताए ।
धरान उपमहानगरको सहकारी विकास समितिले केही समयअगि प्रहरीलाई आवश्यक कारबाहीका लागि भनी पत्राचार गरेको थियो । विकास समितिले आवश्यक कारबाहीका लागि पत्राचार गरेको विषयमा डिएसपी श्रेष्ठलाई जानकारी गराउँदा पनि आफूलाई ‘कसैले पक्राउ गर भन्दैमा पक्राउ नगर्ने’ प्रतिक्रिया दिएको बचतकर्ता प्रधानले बताइन् ।
धरान उपमहानगरका वरिष्ठ आर्थिक विकास अधिकृत तथा सहकारी विकास समितिका सदस्य–सचिव भक्तिराज शर्माले समस्या आएका सहकारीका विषयमा आवश्यक कारबाही गर्न प्रहरीलाई सिफारिस गर्ने गरेको बताए । उनले भने, ‘भविष्य सहकारीका सञ्चालकलाई पनि आवश्यक कारबाही गर्न प्रहरीलाई सिफारिस गरेका थियौं ।’
केही वर्ष पहिले सल्लेरी बचत तथा ऋण सहकारी संस्थाका सञ्चालक कृष्ण दर्नाललाई पनि समितिले सिफारिस गरेको आधारमा नियन्त्रणमा लिएको दाबी गरे । उनले भने, ‘यो पनि त्यस्तै केस हो ।’ अध्यक्ष लिम्बू सयौँ बचतकर्ताको कराडौँ रकम अपचलन गरी असारदेखि फरार थिए ।
