सुनसरी । बोर्डर आउट पोष्ट (बीओपी) नजिकैबाट ९ लाख रुपैयाँभन्दा बढीको तस्करी गरी भित्र्याइएको कपडासहितको सामग्री बरामद गरिएको छ ।
सुनसरी भन्सार कार्यालय सेतुबन्ध कोसी ब्यारेजका भन्सार अधिकृत पर्शुराम दाहालको नेतृत्वमा खटिएको टोलीले बुधबार बिहान सामग्री बरामद गरेको हो । कोसी गाउँपालिका–१ लौकहीबाट ९ लाख १० हजार १ सय ५० रुपैयाँ बराबरको सामान नियन्त्रणमा लिइएको हो ।
लौकहीस्थित सशस्त्र प्रहरी बल बिओपीभन्दा चार सय मिटरको दूरीमा को.२ च २७८० नम्बरको पिकअप गाडीमा भारतीय बजारबाट ल्याइएको कपडाका विभिन्न सामग्री नियन्त्रणमा लिइएको हो । उनका अनुसार २६ हजार ५ सय ५० रुपैयाँ बराबरको कुर्ता, सलवार ५९ थान, एकलाख ३२ हजार चारसय रुपैयाँ बराबरको ३ सय ३१ जोर रेग्जिन जुत्ता, १० हजार ८ सय बराबरको ढाका कपडा, २० हजार बराबरको बनारसी सारी १० थान, ३७ सय बराबरको मखमल कपडा, ६० हजार बराबरको पेटीकोट ४ सय थान, ५२ हजार बराबरको कुर्ता सलवार कटाइ गरेको ५२ थान, ८५ हजार बराबरको टप्स ३ सय ४० थान, दुईलाख ९६ हजार बराबरको लेगिज १ हजार ४ सय ८० थान बरामद गरेको छ ।
त्यस्तै ३२ हजार ४ सय बराबरको जेन्स टप्स १ सय ८ थान, १ लाख ९८ हजार बराबरको राधे राधे सुरुवाल १ सय ९८ थान, ८० हजार बराबरको पर्दा ४ सय थान, ६७ हजार ५ सय बराबरको नेट सारी ४५ थान र २४ हजार बराबरको सिफन सारी २४ थान गरी जम्मा नौ लाख १० हजार १ सय ५० रुपैयाँ बराबरको विभिन्न सामान बरामद गरिएको हो ।
जिल्लाको विभिन्न सीमा नाकाबाट सीमामा तैनाथ सुरक्षाकर्मीकै मिलेमतोमा दैनिक लाखौंको तस्करी हुने गरेको गुनासो आइरहेको बखत सुनसरी भन्सार कार्यालयबाट खटिएको टोलीले ठूलो परिमाणमा सामान बरामद गरेको छ ।
