धरान । प्रदेश १ का मुख्यमन्त्री राजेन्द्रकुमार राईले जनचाहनाअनुसार काम गर्न नसकेको स्वीकार गरेका छन् । उनले प्रदेश सरकारले पहल गर्दागर्दै पनि जनताको आवश्यकता र चाहनाअनुसार काम गर्न नसकेको बताएका हुन् ।
मङ्गलबार नेपाल पत्रकार महासङ्घ प्रदेश १ समितिको दोस्रो वार्षिक साधारणसभाको उद्घाटन गर्दै प्रदेश सरकारले जनअपेक्षाअनुसार नतिजा दिन नसकेको स्वीकारे ।
मुख्यमन्त्री राईले असुविधा र हतारबाट बनेको प्रदेशको गठबन्धन सरकारले सञ्चार क्षेत्रलाई अत्यन्त महŒव दिएको दाबी गर्दै बजेटको सीमितताले सञ्चार क्षेत्रमा धेरै काम गर्न नसकेको बताए ।
प्रदेश सरकारले पत्रकार महासङ्घको भौतिक विकासका लागि प्रत्येक जिल्लामा भवन निर्माण गर्न बजेट विनियोजन गरेको उल्लेख गर्दै उनले लोकतन्त्रलाई सुदृढ गर्न सञ्चार क्षेत्रले रचनात्मक एवम् आलोचनात्मक भूमिका निर्वाह गर्नुपर्ने कुरामा जोड दिए ।
सो अवसरमा आर्थिक मामिला तथा योजनामन्त्री इन्द्रबहादुर आङ्बोले राजनीतिक तथा सामाजिक परिवर्तनमा नेपाली पत्रकारिताको महŒवपूर्ण योगदान रहेको बताए । यातायात तथा सञ्चारमन्त्री उपेन्द्रप्रसाद घिमिरेले श्रमजीवी पत्रकारका हक, हित र अधिकारका लागि प्रदेश सरकार सदैव तयार रहेको स्पष्ट पारे ।
नेपाल पत्रकार महासङ्घ प्रदेश समितिका अध्यक्ष लीलावल्लभ घिमिरेको अध्यक्षतामा भएको सो कार्यक्रममा महासङ्घका केन्द्रीय अध्यक्ष विपुल पोखरेलले पत्रकारको पेशागत सुरक्षा हुनुपर्नेमा जोड दिए ।
