विराटनगर । विराटनगरका उद्योगी व्यवसायीहरुले नियमित विद्युत आपूर्ति गर्न माग गरेका छन् । विराटनगरमा मंगलबार पत्रकार सम्मेलन गरि यस्तो माग गरेका हुन् ।
भारतबाट विद्युत खरिद गर्न नपाएको कारण देखाउँदै नेपाल विद्युत प्राधिकरणले दैनिक १२ घण्टासम्म अघोषित रूपमा विद्युत कटौती गरेको उद्योगीहरुले बताएका छन् । नेपाल उद्योग परिसंघ प्रदेश १ अध्यक्ष भीम घिमिरेले अघोषित रूपमा विद्युत कटौती भएको भन्दै नियमित विद्युत दिन नसक्ने भए लोडसेडिङको तालिका दिनुनपर्ने बताए ।
अनियमित रूपमा विद्युत कटौती हुँदा उद्योगका मजदुरहरू बेरोजगार हुनुपर्ने अवस्था आएको उद्योगीहरुको गुनासो छ । मोरङ व्यापार संघका अध्यक्ष नवीन रिजालले सोमबार बेलुका ४ बजे गएको बिजुली आइतबार बिहान ६ बजे मात्रै आएको बताए । एक सातायता दैनिक विद्युत कटौती हुँदा हैरान भोग्नु परेको उद्योग सङ्गठन मोरङका अध्यक्ष सुयश प्याकुरेलले बताए ।
प्रदेश १ मा रहेका तीन निजी क्षेत्रको संस्थाले मंगलबार पत्रकार सम्मेलन गर्दै कुनैपनि बहानामा विद्युत कटौती गर्न नमिल्ने बताएका छन् । नेपाल उद्योग परिसङ्घ, मोरङ व्यापार संघ र उद्योग सङ्गठनले नियमित विद्युत आपूर्ति गर्न माग गरे ।
व्यवसायीले विद्युत कटौती गर्ने भए स्थानीय तहको निर्वाचनमा दलहरूलाई चन्दा दिन नसक्ने बताएका छन् । विद्युत आपूर्ति नियमित नभए व्यवसाय नचल्ने भन्दै उनीहरुले दलहरूलाई चुनावमा सहयोग गर्न नसक्ने बताएका छन् ।
उद्योगलाई आवश्यक विद्युत उपलब्ध गराउने दायित्वको सरकारको भएको भन्दै उनीहरुले मूल्य कति पर्छ भन्ने विषय सरकारको भएकाले उद्योग व्यवसाय संचालन गर्न आवश्यक विद्युत नियमित आपूर्ति गर्नुपर्ने बताए ।
भारतबाट विद्युत खरिदका लागि दैनिक हुने खरिद बोलकबोलमा महंगो दररेट प्रस्ताव गर्दासमेत विद्युत नपाएको विद्युत प्राधिकारणले जनाएको छ । विश्वव्यापी रुपमा बढिरहेको मुल्यबृद्धि तथा भारतमा नै चरम उर्जा संकट भई अप्रत्यासित मूल्यबृद्धि हुदा नेपालले विद्युत खरिद गर्न सकेको छैन ।
