विराटनगर । विराटनगरका उद्योगी व्यवसायीहरूले नियमित विद्युत् आपूर्ति गर्न माग गरेका छन् । विराटनगरमा मङ्गलबार पत्रकार सम्मेलन गरी यस्तो माग गरेका हुन् ।
भारतबाट विद्युत् खरिद गर्न नपाएको कारण देखाउँदै नेपाल विद्युत् प्राधिकरणले दैनिक १२ घण्टासम्म अघोषित रूपमा विद्युत् कटौती गरेको उद्योगीहरूले बताएका छन् । नेपाल उद्योग परिसङ्घ प्रदेश १ अध्यक्ष भीम घिमिरेले अघोषित रूपमा विद्युत् कटौती भएको भन्दै नियमित विद्युत् दिन नसक्ने भए लोडसेडिङको तालिका दिनु नपर्ने बताए ।
अनियमित रूपमा विद्युत् कटौती हुँदा उद्योगका मजदुरहरू बेरोजगार हुनुपर्ने अवस्था आएको उद्योगीहरूको गुनासो छ । मोरङ व्यापार सङ्घका अध्यक्ष नवीन रिजालले सोमबार बेलुका ४ बजे गएको बिजुली आइतबार बिहान ६ बजे मात्रै आएको बताए । एक सातायता दैनिक विद्युत् कटौती हुँदा हैरानी भोग्नुपरेको उद्योग सङ्गठन मोरङका अध्यक्ष सुयश प्याकुरेलले बताए ।
प्रदेश १ मा रहेका तीन निजी क्षेत्रका संस्थाले मङ्गलबार पत्रकार सम्मेलन गर्दै कुनै पनि बहानामा विद्युत् कटौती गर्न नमिल्ने बताएका छन् । नेपाल उद्योग परिसङ्घ, मोरङ व्यापार सङ्घ र उद्योग सङ्गठनले नियमित विद्युत् आपूर्ति गर्न माग गरे । व्यवसायीले विद्युत् कटौती गर्ने भए स्थानीय तहको निर्वाचनमा दलहरूलाई चन्दा दिन नसक्ने बताएका छन् ।
उद्योगलाई आवश्यक विद्युत् उपलब्ध गराउने दायित्वको सरकारको भएको भन्दै उनीहरूले मूल्य कति पर्छ भन्ने विषय सरकारको भएकाले उद्योग व्यवसाय सञ्चालन गर्न आवश्यक विद्युत् नियमित आपूर्ति गर्नुपर्ने बताए ।
भारतबाट विद्युत् खरिदका लागि दैनिक हुने खरिद बोलकबोलमा महँगो दररेट प्रस्ताव गर्दासमेत विद्युत् नपाएको विद्युत् प्राधिकारणले जनाएको छ । विश्वव्यापी रूपमा बढिरहेको मूल्यवृद्धि तथा भारतमा नै चरम् ऊर्जा सङ्कट भई अप्रत्यासित मूल्यवृद्धि हुँदा नेपालले विद्युत् खरिद गर्न सकेको छैन ।
यस्तै नेपाल उद्योग वाणिज्य महासङ्घ प्रदेश नं. १ ले लोडसेडिङ हटाउन माग गरेको छ । सरकारले विद्युत् खपत बढाउन उद्योगलाई प्रोत्साहन गर्ने नीति ल्याएपछि विद्युत् प्राधिकरणप्रति विश्वस्त भई सबैजसो ठूला उद्योगहरूले करोडौंको थप लगानी गरेको अवस्थामा लोडसेडिङ हुँदा ठूलो क्षति हुने गरेको सङ्घका अध्यक्ष टीकाराज ढकालद्वारा विज्ञप्तिमा जनाइएको छ ।
