बिर्तामोड । बन्द निषेधितक्षेत्र बनाउने घोषणा गरेका व्यवसायीले नै झापाको बिर्तामोड बन्द गरेका छन् । व्यवसायीको बन्दका कारण बिहीबार तीन घण्टा पूर्व–पश्चिम राजमार्गसमेत अवरुद्ध भएको थियो ।
बन्द गर्न उद्योग वाणिज्य सङ्घका महासचिव अर्जुन मैनाली नै सडकमा उपस्थित थिए । झापाको एक सञ्चारमाध्यमलाई केही दिनअघि अन्तरवार्ता दिँदै मैनालीले बिर्तामोडलाई बन्द निषेधित क्षेत्र घोषणा गर्ने तयारी गरिरहेको बताएका थिए । मैनालीको नेतृत्वमा बिहीबार बिर्तामोडको व्यवसाय तथा यातायात बन्द भएको छ ।
शनिश्चरे रोडमा रहेको शाह कपडा पसलमा राजश्व अनुसन्धान कार्यालयले ‘सिल’ गरेपछि स्थानीय व्यवसायीले बिहीबार बिर्तामोडमा यातायात अवरुद्ध गरेका हुन् । राजश्व अनुसन्धान कार्यालय इटहरीले अनुगमनका क्रममा लालबाबु शाहले सञ्चालन गर्दै आएको शाह कपडा पसल सिल गरेको बुझिएको छ ।
सिल गरेको सूचना पाएपछि व्यवसायीका प्रतिनिधि पुग्नासाथ राजस्वका कर्मचारी भागेको भन्दै यातायात अवरुद्ध गरिएको छ । बिर्तामोड उद्योग वाणिज्य सङ्घका महासचिव अर्जुन मैनालीका अनुसार राजस्वका कर्मचारी भागेको कुराले आशङ्का उब्जाएको छ ।
उनले किन सिल भयो भनेर सोधीखोजीसमेत गर्न नपाएको जानकारी दिए । राजस्व कार्यालयको दादागिरी विरुद्ध सबै व्यवसायीलाई विरोधमा उत्रिन उनले आह्वानसमेत गरेका थिए ।
त्यसैको विरोधमा बिर्तामोडका व्यापारीले पसल बन्द गरेर सडक अवरोध गरेका थिए । व्यवसायीको अवरोधका कारण बिहीबार दिउँसो तीन घण्टा यातायात सञ्चालन हुन सकेको थिएन । शाहले राजस्व छलेको आशङ्कामा विभागले छानबिन गरेको हो ।
विशेष सूचनाका आधारमा राजस्वको टोली शाहको कपडा पसलमा छापामार्न पुगेको बताइएको छ । राजस्वले चैत १६ गतेको मितिमा पत्र काटेर सो पसलमाथि छानबिन गर्नका लागि वातावरण बनाइदिन अनुरोध गरेको थियो ।
