विजयपुर/बराह बचत तथा ऋण सहकारी संस्थाले बचतकर्तालाई रकम भुक्तानी गर्न पुनः भाका राख्दै बैशाख १५ गतेदेखि काउण्टर खुल्ला गर्ने बताएको छ ।
बिहीबार पत्रकार सम्मेलन गर्दै २०७९ बैशाख १५ गतेदेखि सहकारीका बचतकर्ता तथा शेयर सदस्यहरूको रकम फिर्ता गर्ने बताएको हो । सहकारीका अध्यक्ष मानबहादुर विश्वकर्माले क्रमिक रुपमा बचतकर्ताको रकम भुक्तानी गर्न सुरु गर्ने बताए । उनले सहकारीका बचतकर्ताको रकम केही ऋण लगानी नउठेको र राज्यको आर्थिक मन्दिको असरले बराह सहकारीलाई आर्थिक सङ्कट उत्पन्न भएको बताए । उनले भने, ‘ठुलो रकम भुक्तानी गर्न सक्दैनौँ । क्रमिक रुपमा रकम भुक्तानी गर्दै जान्छौँ ।’
तर सहकारी कति खराब ऋण कति हो ? कुन क्षेत्रमा कति लगानी गरेको हो? बचतकर्ताको मागअनुसार कति रकम भुक्तानी गर्नु पर्ने भन्ने कुरा खुलाएनन् । उनले सहकारीले विधि प्रक्रियामा रहेर लगानी गरेको दावी गरे । बराहका कर्मचारीले नै ऋण चलाई भुक्तानी नगर्दा बराहमा आर्थिक सङ्कट उत्पन्न भएको भन्ने सञ्चारकर्मीको जिज्ञाशामा विश्वकर्माले स्पष्ट नपारी जसलाई लगानी गरेपनि प्रक्रियागत रुपमा नै लगानी जिकिर गरेका थिए ।
पत्रकार सम्मेलनमा सहकारीका बचतकर्ता कमल राईले कति पटक म्याद थप्ने भन्दै प्रश्न गरेका थिए । उनले विगतमा पनि निकै पटकपटक म्याद दिएपनि रकम भुक्तानी नगरेको बताउँदै १५ गते त्यस्तो नगर्न आग्रह गरे । उनले भने, ‘१५ गते बराह सहकारीलाई र बचतकर्तालाई शुभदिन बनोस् ।’ अर्का पीडितले नुनदेखि सुनसम्म व्यापार गर्ने बराहले बचतकर्तालाई नुन खानासमेत नदिएको बताएका थिए ।
उनले बैशाख १५ गतेपनि रकम भुक्तानी नगरे बचतकर्ता त्यतिकै नबस्ने बताए । बराह ग्रुपका अध्यक्ष शिव लापमछानेले नेपालमा नै आर्थिक मन्दी भएकाले बराह सहकारीलाई पनि आर्थिक सङ्कट उत्पन्न भएको बताए । उनले विस्तारै सहज बनाउँदै जाने बताए । उनले सहकारीमा बचतकर्ताको रकम गोर्खा डिपार्टमेण्ट स्टोर खरिद गर्दा लगानी गरेको भन्ने कुरामा सत्यता नभएको बताए । उनले बराह ग्रुपले लगानी गरेको र सहकारीले लगानी नगरेको बताए ।
उनले सहकारीको समस्यामा बराह ग्रुपले पनि उत्तरदायित्व बहन गर्ने बताए । बराह सहरकीले चैत २२ गते पनि बचतकर्ताको रकम भुक्तानी गर्ने भन्दै सूचना प्रकाशित गरेको थियो । २२ गते बचतकर्ताको रकम भुक्तानी नगरेपनि बचतकर्ताले बराहको भवन घेराउ गरेका थिए । बचतबर्तालाई विगतमा पनि धेरै म्याद थप गर्दै आएको बताएका थिए ।
