विराटनर । प्रदेश १ का मुख्यमन्त्री राजेन्द्र राईले म्यानेजर बनेर उद्योगी, व्यवसायीहरूलाई सहयोग गर्ने बताएका छन् ।
मोरङ व्यापार सङ्घले विराटनगरमा आयोजना गरेको दश दिने ट्रेड एक्स्पोको समापन कार्यक्रममा आइतबार बोल्दै मुख्यमन्त्री राईले ऐन, नियम र शान्ति सुरक्षा सुव्यवस्थापन कायम गरेर सरकारले म्यानेजर बनेर सहयोग गर्ने बताएका हुन् ।
‘तपाईंहरू मेन एक्टरको रूपमा अगाडि बढ्नुहोस् । तपाईंहरूलाई सहज हुने गरी हामी ऐन, नियम र कानून बनाएर सहजीकरण गरिदिनेछौं’–मुख्यमन्त्री राईले भने । यस्ता एक्स्पो आर्थिक विकासको लागि कडी बन्ने उनले बताए । ‘राष्ट्रिय पुँजीको विकास र आर्थिक विकासले यस्ता एक्स्पोहरूले ठूलो भूमिका खेल्नेछन् । यस्ता एक्स्पोले आर्थिक गतिविधिहरू चलायमान हुन्छन्’ मुख्यमन्त्री राईले भने, ‘आफ्नो उत्पादनलाई वृद्धि र राष्ट्रिय पुँजीलाई बढाउन यस्तो एक्स्पोले निरन्तरता पाउनुपर्छ ।’
प्रदर्शनीस्थलको कामको प्रक्रिया अगाडि बढाउन एउटा बैठकको आयोजना गरी प्रक्रिया अगाडि बढाउनुपर्नेमा उनले जोड दिए । ‘प्रदर्शनीस्थलको लागि एउटा मिटिङ राख्यौं । बजेटको विनियोजन गरी सम्पन्न गर्ने गरी कामको आरम्भ गरौं’–उनले भने ।
कार्यक्रममा विराटनगर महानगरपालिकाका प्रमुख भीम पराजुलीले दिगो आर्थिक विकासको लागि औद्योगिक प्रदर्शनीस्थल बनाउन जरुरी रहेको बताए ।
‘कुनै पनि बहानामा औद्योगिक प्रदर्शनीस्थल रोक्नु हुँदैन । जसरी पनि बनाउनु पर्छ । त्यसमा विराटनगर महानगरपालिका तयार रहेको छ’ उनले भने, ‘मुलुकलाई समृद्ध विकासतर्फ अगाडि बढाउन तीन तहको सरकारले निजी क्षेत्रसँग समन्वय र सहकार्य गरी अगाडि बढ्नुपर्दछ ।’
