धरान । आइतबार सम्पन्न प्रतिनिधि तथा प्रदेशसभाको निर्वाचनको मत परिणामहरू आइरहँदा नेपाली काङ्ग्रेस पहिलो शक्ति बन्ने सम्भावना बढेको छ ।
दोस्रो शक्तिका रूपमा एमाले रहने हालसम्मको मत परिणामको आँकडाले देखाएको छ । हाल भइरहेको मतपरिणामअनुसार प्रतिनिधि तथा प्रदेशसभाको प्रत्यक्षतर्फ नेपाली काङ्ग्रेसले सबैभन्दा बढी क्षेत्रमा अग्रता लिएको छ । यता समानुपातिकमा भने एमाले अगाडि छ । यो समाचार तयार पार्दासम्म नेपाली काङ्ग्रेसले प्रतिनिधिसभातर्फ ४६ स्थानमा अग्रता हासिल गरेको छ भने ५ स्थानमा जित हासिल गरिसकेको छ ।
यस्तै एमालेले ४४ स्थानमा अग्रता कायम गर्दा ३ स्थानमा जित हात पारेको छ । नेकपा (माओवादी केन्द्र) ले १८ स्थानमा अग्रता कायम गरे पनि जित हात पार्न सकेको छैन । त्यस्तै रवि लामिछाने नेतृत्वको राष्ट्रिय स्वतन्त्र पार्टी १२ स्थानमा अगाडि छ भने हालसम्म जित हासिल गरेको छैन । त्यस्तै नेकपा (एकीकृत समाजवादी) ले ९ स्थानमा अग्रता कायम गरेको छ । त्यस्तै रेशम चौधरी नेतृत्वको नागरिक उन्मुक्ति पार्टी तीन स्थानमा अगाडि छ भने १ स्थानमा जित हासिल गरिसकेको छ ।
यता प्रदेशसभातर्फ नेकपा (एमाले) अग्रस्थानमा छ । ऊ ९९ स्थानमा अगाडि छ भने एक स्थानमा जित हासिल गरिसकेको छ । त्यस्तै नेपाली काङ्ग्रेसले ६५ स्थानमा अग्रता कायम गर्दा ५ स्थानमा जित हासिल गरिसकेको छ । माओवादी केन्द्रले ३८ स्थानमा अग्रता कायम गरेको छ भने जित हात पारेको छैन ।
राष्ट्रिय प्रजातन्त्र पार्टीले ११ स्थानमा अग्रता कायम गरेको छ भने १ स्थानमा जित हात पारेको अवस्था छ । यता समानुपातिकमा भने हालसम्मको परिणामअनुसार एमाले अग्रस्थानमा छ ।
एमालेले ८४ हजार ८ सय १५ मत ल्याउँदा नेपाली काङ्ग्रेसले ७१ हजार ५ सय २५ मत ल्याएको छ । त्यस्तै राष्ट्रिय स्वतन्त्र पार्टी तेस्रो स्थानमा छ । उसले ३६ हजार १ सय ९ मत ल्याइसकेको छ । माओवादी केन्द्रले ३२ हजार ७ सय २५ मतमात्रै ल्याएको अवस्था छ ।
