भद्रपुर । झापा ३ बाट प्रतिनिधिसभा सदस्यमा निर्वाचन भएको प्रमाणपत्र ग्रहण गर्दै सञ्चारकर्मीहरूसँग गरेको संक्षिप्त कुराकानीमा राप्रपा अध्यक्ष राजेन्द्र प्रसाद लिङदेनले जनता यथास्थितिको पक्षमा नभई परिवर्तनको पक्षमा रहेको बताएका छन् ।
निर्वाचन परिणामले वर्तमान जन चाहना फरक देखिएको उनले बताए । परिवर्तित सन्दर्भमा परिवर्तित ढङ्गले नै नयाँ समीकरणहरू बनेर जान्छन् उनले भने ।
सोचे अनुसारको अपेक्षित परिणाम नआए पनि जनताको अभिमतलाई स्वीकार गरेको उनले जनाए । अघिल्लो पटक एक्लै संसद् भएपनि अब साथीहरू लिएर प्रतिनिधि सभामा जाने उनले बताए ।
जनताको अभिमतलाई कदर गर्दै सधैँ जनताको पक्षमा वकालत गर्ने उनले बताए । उनले म फेरि पनि भन्छु भ्रष्टाचार गर्नु आमाको रगत खानु हो, त्यसैले म भ्रष्टाचार गर्दिन, गर्न पनि दिन्न्,’ उनले थपे । नष्ट हुन्छु तर भ्रष्ट हुन्न उनले भने । लिङदेन प्रतिनिधिसभा सदस्यमा पुनः विजयी भएका हुन् ।
एमालेसँग चुनावी तालमेल गरी झापा क्षेत्र नम्बर ३ बाट उम्मेदवार बनेका लिङदेनले नेपाली काँग्रेसका नेता कृष्णप्रसाद सिटौलालाई ३ हजार २७६ मतान्तरले हराएका हुन् । सिटौला सत्तारुढ गठबन्धनका साझा उम्मेदवार थिए ।
लिङदेनले ४० हजार ६६२ मत ल्याएकोमा सिटौलाले ३७ हजार ३८६ मत प्राप्त गरेका थिए । दुई पटक लिङदेन र दुई पटक सिटौलाले जिते । यस क्षेत्रमा १ लाख ३१ हजार ४३२ मतदाता रहेकोमा ८९ हजार ६३७ मत खसेको मुख्य निर्वाचन अधिकृत चन्द्रमणि ज्ञवालीले जानकारी दिए ।
